Uji në Gostivar ende jashtë përdorimit për pije, 73 kontrolle mjekësore në një ditë

Agjencia e Ushqimit dhe Veterinarisë vazhdon monitorimin e analizave të ujit nga ujësjellësi i Gostivarit, ndërsa procesi i marrjes së mostrave do të vijojë edhe gjatë fundjavës. Autoritetet thonë se ende nuk mund të parashikohet se kur uji do të jetë i sigurt për t’u përdorur për pije dhe për përgatitjen e ushqimit.

Ministri i Shëndetësisë, Sasho Klekovski, tha se çdo ditë merren mostra nga të paktën nëntë pika të konsumit dhe se nevojiten tri rezultate radhazi të përshtatshme që të hiqet ndalesa për përdorimin e ujit për pije.

“Mostrat po monitorohen dhe procesi do të vazhdojë edhe gjatë fundjavës. Në momentin kur tri mostra radhazi rezultojnë të përshtatshme për pije, ujësjellësi do të vihet në përdorim”, deklaroi Klekovski, duke shtuar se aktualisht uji mund të përdoret për qëllime të tjera, por jo për pije dhe për përgatitjen e ushqimit të freskët.

Ndërkohë, në institucionet publike shëndetësore në Gostivar, dje janë kontrolluar gjithsej 73 pacientë. Në Spitalin e Përgjithshëm “Ferid Murat” janë regjistruar 45 kontrolle të reja, prej të cilave 26 në repartin infektiv, ku janë shënuar edhe dy hospitalizime të reja, si dhe 18 kontrolle në pediatri. Aktualisht, në repartin infektiv dhe në atë të pediatrisë janë të hospitalizuar nga dy pacientë.

Në Shtëpinë e Shëndetit në Gostivar janë regjistruar edhe 28 kontrolle të reja në shërbimin kujdestar.

Autoritetet shëndetësore vlerësojnë se situata epidemiologjike në Gostivar po qetësohet, por paralajmërojnë se mbetet rreziku për shfaqjen e sëmundjeve infektive, përfshirë hepatitin A dhe E.

Në këtë situatë, CIVILi dhe CIVILi i Gjelbër kanë kërkuar nga institucionet shtetërore, partitë politike dhe autoritetet lokale që të ndalojnë përplasjet politike dhe akuzat e ndërsjella dhe të fokusohen në zgjidhjen e krizës së ujit. Sipas tyre, bëhet fjalë për një krizë të shëndetit publik dhe për shkelje të së drejtës themelore të qytetarëve për ujë të pastër dhe të sigurt.

Kriza në Gostivar nisi pasi më 17 korrik u ndalua përdorimi i ujit për pije, pas konstatimit se një pompë kishte futur ujëra të ndotura drejtpërdrejt në sistemin e ujësjellësit. Më pas, drejtoresha e NP “Komunalec” dhe dy të punësuar u arrestuan dhe ndaj tyre u hap hetim për ndotjen e ujit.

Analizat e publikuara më 20 korrik treguan ndotje të lartë bakteriale. Në mostrat e ujit u gjetën 2.419,6 cfu/100 ml baktere koliforme, ndërsa kufiri maksimal i lejuar është 50 cfu/100 ml. Gjithashtu u konstatua prani e baktereve koliforme në burimin e ujit, ku sipas standardeve duhet të ketë zero prani.

Situata mbetet nën monitorim, ndërsa banorët e Gostivarit duhet të presin rezultatet e analizave të reja për të mësuar se kur uji i ujësjellësit do të mund të përdoret sërish për pije.