Të rinjtë në Maqedoni largohen nga shtëpia e prindërve pas të 30-ave – shumë më vonë se mesatarja e BE-së

Të rinjtë në Maqedoni largohen nga shtëpia e prindërve mesatarisht në moshën 30,7 vjeç, rreth 4,4 vjet më vonë se mesatarja e Bashkimit Evropian, e cila në vitin 2025 ishte 26,3 vjeç, tregojnë të dhënat e Eurostat-it.

Në Evropë, të rinjtë qëndrojnë më gjatë te prindërit në Kroaci, ku mosha mesatare e largimit është 31,5 vjeç. Pas saj renditen Greqia dhe Sllovakia me nga 30,9 vjeç, ndërsa në Spanjë dhe Itali mesatarja është 30,2 vjeç.

Në anën tjetër, të rinjtë largohen më herët nga shtëpia e prindërve në Finlandë, në moshën 21,4 vjeç, në Danimarkë në 21,8 vjeç, si dhe në Estoni dhe Lituani në 22,7 vjeç.

Në rajon, të rinjtë në Serbi largohen nga shtëpia e prindërve mesatarisht në moshën 30,1 vjeç, në Bosnjë dhe Hercegovinë në 29,5 vjeç, ndërsa në Bullgari në 27,9 vjeç.

Sipas Eurostat-it, ekziston një lidhje mes moshës së largimit nga shtëpia e prindërve dhe punësimit të të rinjve. Në vitin 2025, shkalla e punësimit për grupmoshën 20–29 vjeç në BE ishte 65,5%.

Në shumicën e vendeve ku të rinjtë largohen më herët nga shtëpia, punësimi i tyre është mbi mesataren e BE-së. Kjo vërehet, për shembull, në Holandë, Danimarkë, Gjermani dhe Suedi.

Në të kundërtën, në vende si Greqia, Kroacia, Spanja dhe Italia, ku të rinjtë qëndrojnë më gjatë me prindërit, shkalla e punësimit është nën mesataren e BE-së.

Në Maqedoni, shkalla e punësimit të të rinjve të moshës 20–29 vjeç në vitin 2025 ishte 50,2%.