Supremja shfuqizon vendimin e Apelit për aksidentin në Llaskarcë, lënda kthehet në rishqyrtim

Gjykata Supreme ka shfuqizuar vendimin e Gjykatës së Apelit në Shkup për aksidentin e autobusit në Llaskarcë, me të cilin disa prej të dënuarve u ishin rritur dënimet e shqiptuara nga Gjykata Penale me aktgjykimin e shkallës së parë.

Lënda është kthyer në rishqyrtim dhe për vendimmarrje të re.

Siç njoftoi Gjykata Supreme, Këshilli për vepra penale e ka shqyrtuar lëndën dhe ka pranuar kërkesat e paraqitura nga të dënuarit përmes mbrojtësve të tyre.

“Aktgjykimi i Gjykatës së Apelit në Shkup, i datës 17 prill 2025, anulohet dhe lënda kthehet për rishqyrtim dhe vendimmarrje”, thuhet në njoftimin e Gjykatës Supreme.

Edhe Gjykata Penale konfirmoi vendimin e Supremes.

“Me vendim të Gjykatës Supreme, aktgjykimi i shkallës së dytë, përkatësisht aktgjykimi i Apelit, shfuqizohet dhe kthehet për vendimmarrje të përsëritur”, thanë nga Gjykata Penale.

Apeli ua kishte rritur dënimet

Gjykata e Apelit në Shkup, në prill të vitit 2025, ua kishte rritur dënimet me burg disa prej të dënuarve për aksidentin e autobusit në Llaskarcë.

Në mesin e tyre ishte pronari i kompanisë “Durmo Turs”, Durmish Beluli, autobusi i së cilës doli nga rruga. Dënimi i tij prej katër vitesh burg, i shqiptuar nga Gjykata Penale, nga Apeli ishte rritur në 10 vjet burg.

Përgjegjësi për transport në kompani, Remzi Miftari, i cili në shkallën e parë ishte dënuar me gjashtë vjet burg, nga Apeli u dënua me 10 vjet.

Dy të punësuarit në stacionin për kontroll teknik, Igor Gjorgjievski dhe Goran Dukovski, në vend të dënimeve prej pesë vitesh burg të shqiptuara në shkallën e parë, nga Apeli u dënuan me nga shtatë vjet burg.

Dënimet e të punësuarit të tretë në stacionin për kontroll teknik, Jane Bovarovski, dhe të shoferit të autobusit, Manoil Trifunovski, mbetën të pandryshuara, përkatësisht pesë dhe 14 vjet burg.

Me aktgjykimin e shkallës së parë, të shpallur në janar të vitit 2024, të akuzuarit u shpallën fajtorë dhe u dënuan me gjithsej 39 vjet burg.

Aksidenti në Llaskarcë

Aksidenti ndodhi më 13 shkurt 2019, kur autobusi i kompanisë “Durmo Turs” doli nga autostrada pranë fshatit Llaskarcë, derisa po qarkullonte në linjën e rregullt Shkup–Gostivar.

Si pasojë e aksidentit, humbën jetën 16 udhëtarë, ndërsa 38 të tjerë u lënduan.

Procesi gjyqësor nisi po atë vit. Në bankën e të akuzuarve u ulën pronari i “Durmo Turs”, Durmish Beluli, drejtuesi i kompanisë, shoferi i autobusit dhe tre persona të punësuar në stacionin për kontroll teknik ku ishte kontrolluar autobusi.

Me vendimin e fundit të Gjykatës Supreme, çështja rikthehet për rishqyrtim dhe vendimmarrje të re.