Policia Financiare ngre padi për falimentim të qëllimshëm, dyshime për borxhe mbi 290 milionë denarë

Drejtoria e Policisë Financiare ka ngritur padi penale ndaj dy personave dhe dy personave juridikë nga Vallandova dhe Dojrani, nën dyshimin për shkaktim të qëllimshëm të falimentimit.

Sipas Policisë Financiare, pronari dhe drejtuesi i një kompanie nga Vallandova dyshohet se gjatë periudhës 2020–2023 ka ndërmarrë veprime të kundërligjshme për t’iu shmangur detyrimeve financiare ndaj kreditorëve, në vlerë prej mbi 289 milionë denarësh, si dhe detyrimeve ndaj Drejtorisë së të Ardhurave Publike prej 883 mijë denarësh.

Sipas dyshimeve, përmes një kontrate qiraje që nuk ishte zbatuar realisht, ishin evidentuar penalitete prej 233,7 milionë denarësh dhe ishte regjistruar barrë mbi pasurinë e kompanisë. Pasi kjo përpjekje për tjetërsimin e pasurisë dështoi, dyshohet se janë ndërmarrë veprime të tjera për ta çuar kompaninë drejt falimentimit, përfshirë transferimin e 4 milionë denarëve në formë huaje.