Mexhiti: 2 Gushti na rikthen te vlerat e lirisë, barazisë dhe bashkëjetesës

Njëri nga liderët e VLEN-it dhe kryetari i Komunës së Çairit, Izet Mexhiti, me rastin e 2 Gushtit – Ditës së Republikës, tha se kjo datë i rikthen qytetarët te vlerat e lirisë, barazisë dhe bashkëjetesës që përfaqëson Republika e Krushevës, shkruan Portalb.mk.

“Këto ideale mbeten themel mbi të cilin duhet të vazhdojmë ta ndërtojmë Maqedoninë e Veriut si shtet demokratik dhe multietnik.

Sot, më shumë se kurrë, kemi përgjegjësinë që këto vlera t’i shndërrojmë në realitet për çdo qytetar. Forca e shtetit qëndron në respektin e ndërsjellë, në mundësitë e barabarta dhe në përfaqësimin e drejtë të të gjitha etnive.

Në këtë ditë, ripërtërijmë përkushtimin tonë për një shoqëri ku sundon ligji, ku puna dhe merita vlerësohen, ku të rinjtë e ndërtojnë të ardhmen në vendin e tyre dhe ku diversiteti ynë është burim force e zhvillimi”, u shpreh Mexhiti.

Ndryshe, me rastin e Ditës së Republikës – 2 Gushtit, urime kanë përcjellë edhe liderë të tjerë politikë.