Mbi 2.2 milionë euro dëm i dyshuar nga një skemë kriminale me regjistrimin e automjeteve, tre të arrestuar
Një skemë e dyshuar kriminale që dyshohet se ka zgjatur pesë vjet dhe përmes së cilës janë përvetësuar mbi 138.8 milionë denarë, ose rreth 2.26 milionë euro, gjatë regjistrimit të automjeteve, është zbardhur nga Ministria e Punëve të Brendshme.
Policia ka ngritur kallëzim penal ndaj gjashtë personave fizikë dhe tre personave juridikë, ndërsa tre të dyshuar janë privuar nga liria.
Aksioni është zhvilluar më 2 dhe 3 shtator në disa lokacione në Shkup, nën drejtimin e Prokurorisë Publike për Ndjekjen e Krimit të Organizuar dhe Korrupsionit.
Gjatë kontrolleve janë sekuestruar 27.735 euro, 38.500 denarë, 750 franga zvicerane dhe 100 dollarë, si dhe telefona celularë dhe dy automjete.
Në qendër të hetimit është një kompani nga Kuçevishte, e cila që nga viti 2011 kishte autorizim për kryerjen e kontrolleve teknike të automjeteve. Sipas MPB-së, nga 1 janari 2021 deri më 20 janar 2026, pronari i kompanisë, S.S., dyshohet se ka përgatitur dhe dorëzuar raporte të rreme për tarifat e mbledhura gjatë regjistrimit të automjeteve.
Policia pretendon se qëllimi ishte përfitimi i kundërligjshëm në vlerë prej 138.877.419 denarësh.
Në skemë, sipas hetimit, ka qenë i përfshirë edhe D.M., i cili ishte i autorizuar për përgatitjen dhe nënshkrimin e faturave dhe dorëzimin e raporteve tek institucionet kompetente.
Paratë dyshohet se më pas janë kanalizuar përmes një shoqërie brokerimi të sigurimeve, ku janë mbledhur edhe tarifa që, sipas MPB-së, nuk duhej të paguheshin në llogarinë e kësaj shoqërie. Në këtë pjesë të skemës dyshohet se kanë pasur rol edhe Sh.S. dhe Z.Gj., anëtarë ekzekutivë të Bordit të Drejtorëve të shoqërisë së sigurimeve, ndërsa S.S. ka qenë anëtar joekzekutiv.
Sipas policisë, mjetet janë transferuar ndërmjet llogarive të personave juridikë dhe janë përzier me të ardhurat nga aktiviteti i rregullt, kryesisht duke u paraqitur si hua. Një pjesë e parave dyshohet se është përdorur për blerjen e pasurive të paluajtshme në interes të personit juridik.
Në hetim është përfshirë edhe T.M., ndihmësdrejtoreshë për financa në Ndërmarrjen Publike për Rrugët Shtetërore. Sipas MPB-së, ajo nuk ka kryer mbikëqyrjen e duhur mbi pagesat dhe raportet e kompanisë.
Policia pretendon se përmes kësaj është mundësuar përfitim i kundërligjshëm prej 48.434.406 denarësh vetëm në lidhje me tarifën rrugore.
Një tjetër i dyshuar është kontabilisti M.D., i cili, sipas MPB-së, ka evidentuar të dhëna të pavërteta në dokumentacionin kontabël dhe ka dorëzuar deklarata tatimore dhe llogari vjetore që nuk pasqyronin gjendjen reale financiare të kompanisë.
Sipas përllogaritjeve të policisë, dëmi i dyshuar është shpërndarë në disa institucione: 48.434.406 denarë ndaj Ndërmarrjes Publike për Rrugët Shtetërore, 1.485.926 denarë ndaj Kryqit të Kuq, 5.585.098 denarë ndaj Ministrisë së Mjedisit dhe 83.371.988 denarë ndaj buxhetit dhe taksave komunale.
Për rastin është dorëzuar kallëzim penal në Prokurorinë Publike për Ndjekjen e Krimit të Organizuar dhe Korrupsionit, ndërsa vendimin e mëtejshëm pritet ta marrin organet kompetente gjyqësore.
