Filipçe kërkon pagë minimale 600 euro dhe mbështetje financiare për bujqit
Lideri i LSDM-së, Venko Filipçe, kërkon rritjen e pagës minimale në 600 euro dhe mbështetje financiare për bujqit. Gjatë takimeve me qytetarët dhe bujqit në Ovçe Pole, Filipçe tha se në Kuvend janë dorëzuar propozime për rritjen e pagës minimale dhe për masa financiare në mbështetje të bujqësisë.
Sipas Filipçes, qytetarët po përballen me rritje të kostove të jetesës, ndërsa nevojitet më shumë mbështetje për punëtorët me paga minimale, pensionistët me të ardhura të ulëta, familjet në gjendje të vështirë sociale dhe familjet me shumë fëmijë.
Ai foli edhe për problemet e bujqve në rajonin e Ovçe Poles, duke përmendur mungesën e blerjes së rrushit dhe grurit, çmimet e ulëta të qumështit dhe rritjen e shpenzimeve për naftë dhe plehra.
Filipçe kërkoi që pushteti të mbështesë propozimet në Kuvend dhe të ndërmarrë masa për bujqësinë. Ai përcolli edhe paralajmërimin e bujqve se, nëse problemet vazhdojnë pa zgjidhje, brenda dy vitesh bujqësia në këtë rajon mund të vihet në pikëpyetje.
