Rasti i ujit në Gostivar përplaset politikisht, VMRO-DPMNE dhe LSDM me akuza të ndërsjella
Rasti i epidemisë gastrointestinale në Gostivar, ku mijëra qytetarë kanë kërkuar ndihmë mjekësore, është shndërruar në përplasje politike mes VMRO-DPMNE-së dhe LSDM-së, me të dyja partitë që shkëmbejnë akuza për përgjegjësinë ndaj situatës.
LSDM akuzon institucionet se kanë reaguar me vonesë, edhe pse, sipas tyre, kishte informacione dhe dyshime të hershme për pasigurinë e ujit dhe rritjen e numrit të pacientëve. Partia opozitare pretendon se pompa ilegale kanë futur ujë nga lumi Vardar në sistemin e ujësjellësit, duke shkaktuar përhapjen e epidemisë.
“Epidemia nuk shpërtheu brenda natës. Institucionet kishin detyrim të reagonin menjëherë dhe qytetarët meritojnë përgjigje se pse u prit kaq gjatë”, thuhet në reagimin e LSDM-së.
Nga ana tjetër, VMRO-DPMNE i hodhi poshtë akuzat, duke fajësuar drejtuesit lokalë të mbështetur nga LSDM, BDI dhe Arben Taravari për menaxhimin e situatës në Gostivar. Sipas partisë në pushtet, rasti do të ketë epilog ligjor dhe përgjegjësit do të përballen me drejtësinë.
Ndërkohë, ministri i Shëndetësisë, Sasho Klekovski, deklaroi se Ministria nuk ka fshehur asnjë informacion lidhur me situatën. Ai bëri të ditur se rasti i parë është regjistruar më 13 korrik, ndërsa informacioni i parë zyrtar në Ministrinë e Shëndetësisë ka mbërritur më 18 korrik.
Sipas Klekovskit, deri tani janë regjistruar rreth 3.100 kontakte shëndetësore të qytetarëve me simptoma gastrointestinale. Ai konfirmoi gjithashtu se analizat e Institutit të Shëndetit Publik për mostrat e ujit të marra në katër lokacione në Gostivar kanë treguar devijime nga parametrat normalë.
Qeveria ka vendosur të sigurojë nga 50 mijë litra ujë të pijshëm falas në ditë për qytetarët e Gostivarit, derisa të përfundojnë hetimet dhe të hiqen masat kufizuese për përdorimin e ujit nga rrjeti i ujësjellësit.
Institucionet shëndetësore vijojnë hetimet epidemiologjike dhe analizat laboratorike për të përcaktuar shkaktarin e epidemisë, ndërsa rekomandimi që uji i ujësjellësit të mos përdoret për pije dhe gatim mbetet ende në fuqi.
