Rrezik i lartë nga zjarret në pothuajse gjithë Maqedoninë e Veriut

Sipas indeksit meteorologjik të rrezikut nga zjarret, pothuajse i gjithë territori i Maqedonisë së Veriut ndodhet aktualisht në zonën me rrezik të lartë nga zjarret, e shënuar me ngjyrë portokalli.

Përjashtim bëjnë Malet e Sharrit, si dhe rrethina e Ohrit dhe Resnjës, ku është regjistruar rrezik mesatar, i shënuar me ngjyrë të verdhë.

Qendra për Menaxhim me Kriza paralajmëron se kushtet aktuale atmosferike favorizojnë shfaqjen dhe përhapjen e shpejtë të zjarreve në ambiente të hapura, përfshirë edhe zjarret pyjore me intensitet të lartë.

Autoritetet u bëjnë apel qytetarëve të tregojnë kujdes maksimal gjatë qëndrimit në natyrë dhe të shmangin çdo përdorim të zjarrit në ambiente të hapura. Në rast se vërehet zjarr, qytetarët duhet ta raportojnë menjëherë në numrin 112.

Qeveria ka shpallur gjendje krize në të gjithë territorin e vendit deri në fund të gushtit, për shkak të rritjes së rrezikut nga zjarret në hapësira të hapura dhe zonat pyjore. Ndërkohë, Instituti i Shëndetit Publik ka paralajmëruar qytetarët të marrin masa mbrojtëse për shkak të temperaturave të larta.

Maqedonia e Veriut është përballur edhe në vitet e kaluara me një numër të madh zjarresh, veçanërisht gjatë muajve të verës, duke shkaktuar dëme të konsiderueshme në zona pyjore dhe hapësira të tjera.