“Shporta shkollore” me zbritje deri në 15% – Qeveria pritet ta miratojë të martën

Para fillimit të vitit të ri shkollor, Ministria e Ekonomisë dhe Punës i ka dorëzuar Qeverisë propozim-vendimin për vendosjen e të ashtuquajturës “shportë shkollore”, e cila parashikon zbritje deri në 15 për qind për pajisjet shkollore.

Masa është dakorduar në konsultim me tregtarët me shumicë dhe pakicë dhe synon të ulë shpenzimet e prindërve përpara fillimit të vitit shkollor. Përbërja dhe çmimi i shportës do të ndryshojnë sipas tregtarit, në varësi të përzgjedhjes, cilësisë dhe markës së produkteve.

Produktet e përfshira do të jenë të shënuara dhe të vendosura në vende të dukshme, ndërsa çmimet do të jenë të qarta. Zbritja do të llogaritet në arkë dhe do të pasqyrohet në kuponin fiskal.

Në shportë pritet të përfshihen çanta, fletore, lapsa, markera, blloqe vizatimi dhe pajisje të tjera bazë shkollore.

Kryeministri Hristijan Mickoski konfirmoi se Qeveria do ta shqyrtojë propozimin në mbledhjen e së martës, kur pritet edhe miratimi i masës.

“Shporta shkollore” ishte zbatuar edhe vitin e kaluar.