Shkup–Bllacë përplaset sërish: BDI kërkon projektin e ri, qeveria premton autostradë me trase tjetër
Për autostradën Shkup–Bllacë nuk ka projekt apo trase të re, pretendon BDI-ja, duke akuzuar qeverinë se po zbaton projektin e përgatitur gjatë kohës së Ali Ahmetit.
BEKIM REXHEPI – BDI
“Për qytetarët duhet të jetë e qartë: nuk mund të ketë ‘trase të re’ pa plan, projekt dhe akte të reja të miratuara. Prandaj, le ta publikojnë planin e ri urbanistik, projektin e ri, vendimin me të cilin është ndryshuar traseja dhe hartën e parcelave nëpër të cilat kalon rruga. Nuk ka as plan të ri urbanistik, as projekt të ri.”
Nga BDI-ja thonë se aktualisht punohet me planin dhe projektin e mëparshëm.
BEKIM REXHEPI – BDI
“Punojnë me planin dhe projektin që e ka bërë Ali Ahmeti.”
Debati vjen pas vendosjes së gurthemelit për 10 kilometrat e fundit të autostradës Shkup–Bllacë, më 26 gusht. Nga qeveria kanë deklaruar se traseja nuk do të kalojë nëpër parcelat e BDI-së.
Qeveria e kaluar, ndërsa ishte në opozitë, e kishte kritikuar projektin, duke e cilësuar si tepër të shtrenjtë dhe korruptiv.
VMRO-DPMNE – DEKLARATË E MËPARSHME
“Traseja duhet të riprojektohet dhe të fitohet autostrada me çmim shumë më të ulët. BDI-ja dhe LSDM-ja nuk kanë punuar që të ketë autostradë, por për të përfituar.”
Autostrada Shkup–Bllacë ka gjatësi totale prej rreth 12 kilometrash. Ndërtimi kishte nisur në vitin 2020, por për gjashtë vjet u ndërtuan vetëm rreth dy kilometra.
Ministri i Transportit, Aleksandar Nikollovski, ka deklaruar se punimet në terren do të nisin pas përfundimit të procedurave administrative dhe se autostrada pritet të përfundojë për rreth tre vjet e gjysmë. Projekti parashikon pesë tunele, dy galeri dhe 12 ura.
