RMV dhe Turqia thellojnë bashkëpunimin në shërbimet sociale

Maqedonia e Veriut dhe Turqia kanë nënshkruar Memorandum Mirëkuptimi dhe Bashkëpunimi në fushën e shërbimeve sociale. Dokumentin e nënshkruan ministri Gjoko Velkovski dhe ministrja turke Mahinur Ozdemir Goktas. Memorandumi synon forcimin e bashkëpunimit institucional dhe shkëmbimin e përvojave dhe praktikave të mira. Bashkëpunimi do të përfshijë shërbimet sociale për familjet, gratë, fëmijët, personat me aftësi të kufizuara dhe të moshuarit.

 Vëmendje e veçantë do t’i kushtohet punësimit dhe integrimit të personave me aftësi të kufizuara në shoqëri.

 Dy vendet do të bashkëpunojnë edhe në mbështetjen e plakjes aktive dhe luftën kundër dhunës ndaj grave.

 Memorandumi parasheh shkëmbim të ekspertëve, dokumenteve dhe praktikave më të mira, si dhe organizimin e konferencave e seminareve.

 Sipas ministrit Velkovski, synimi është që përvojat e mira të shndërrohen në zgjidhje konkrete për përmirësimin e mirëqenies së qytetarëve.

 Marrëveshja parashikon edhe shkëmbim përvojash në fushën e ndihmës sociale dhe vlerësimit të shërbimeve.

 Memorandumi është nënshkruar për një periudhë prej pesë vitesh, me mundësi vazhdimi automatik.