Kurti formon grup pune për apelimin e dënimit të ish-krerëve të UÇK-së

Qeveria e Kosovës, e udhëhequr nga Albin Kurti, ka formuar një grup pune për hartimin dhe bashkërendimin e një strategjie shtetërore në mbështetje të procedurave të Apelit në rastin e ish-krerëve të UÇK-së. Vendimi vjen pasi Hashim Thaçi, Kadri Veseli, Jakup Krasniqi dhe Rexhep Selimi u dënuan në shkallën e parë me gjithsej 81 vjet burgim, ndërsa mbrojtja e tyre e ka apeluar aktgjykimin.

Grupi do të udhëhiqet nga zëvendëskryeministri dhe ministri i Jashtëm, Glauk Konjufca, dhe do të përfshijë edhe përfaqësues të Kuvendit. Kurti e cilësoi aktgjykimin si të padrejtë dhe tha se Qeveria synon të angazhohet për korrigjimin e tij në shkallën e Apelit.

Ndërkohë, ndryshimet e miratuara në Ligjin për Dhomat e Specializuara të Kosovës kanë nxitur shqetësim te Bashkimi Evropian. Komisionerja për Zgjerim, Marta Kos, deklaroi se ndryshimi i rregullave gjatë proceseve gjyqësore bie ndesh me standardet ndërkombëtare të sundimit të ligjit.

Edhe Avokati i Popullit i Kosovës, Naim Qelaj, shprehu skepticizëm për efektet e ndryshimeve ligjore, duke theksuar se betejat për drejtësi zhvillohen në gjykatë. Ligji i ndryshuar ende pret dekretimin nga presidentja e Kosovës.