BE-ja riafirmon mbështetjen për integrimin evropian të Maqedonisë së Veriut
Bashkimi Evropian mbetet plotësisht i përkushtuar ndaj perspektivës evropiane të Maqedonisë së Veriut dhe e sheh vendin si anëtare të ardhshme me të drejta të plota të Unionit. Këtë mesazh e përcolli ambasadori i BE-së në Shkup, Mihalis Rokas, gjatë fjalimit të tij para Këshillit Kombëtar për Eurointegrime.
Rokas theksoi se procesi i zgjerimit të Bashkimit Evropian është në zhvillim të plotë, duke përmendur konferencat e fundit ndërqeveritare me Shqipërinë, Malin e Zi, Ukrainën dhe Moldavinë si dëshmi të progresit në këtë drejtim.
Ai sqaroi se dokumenti joformal (non-paper) i iniciuar nga Franca dhe Gjermania synon të përshpejtojë procesin e anëtarësimit të vendeve kandidate, duke u mundësuar atyre qasje graduale në tregun e brendshëm evropian paralelisht me përmbushjen e kushteve për anëtarësim të plotë.
“Qëllimi është të përshpejtohet procesi i anëtarësimit dhe njëkohësisht vendeve kandidate t’u mundësohet qasje graduale në tregun e brendshëm të BE-së, ndërsa përmbushin të gjitha parakushtet e nevojshme”, deklaroi Rokas.
Duke folur për progresin e vendit, ai vlerësoi se Maqedonia e Veriut ka dëshmuar kapacitet për zbatimin e reformave dhe përshëndeti punën e Kuvendit në miratimin e legjislacionit të nevojshëm.
Megjithatë, ai nënvizoi se sundimi i ligjit mbetet kriteri kryesor dhe i panegociueshëm në procesin e negociatave për anëtarësim.
Sipas tij, përparimi drejt BE-së kërkon një administratë publike profesionale dhe efikase, si dhe një sistem gjyqësor të pavarur nga ndikimet politike, të pajisur me burime të mjaftueshme njerëzore dhe financiare.
Rokas bëri thirrje për arritjen e një konsensusi të gjerë politik rreth reformave kyçe, veçanërisht për Kodin Zgjedhor dhe Kodin Penal, duke theksuar se këto procese kërkojnë bashkëpunim ndërmjet të gjitha forcave politike.
Ai njoftoi gjithashtu se Bashkimi Evropian po përgatit një kornizë të re shumëvjeçare financiare, e cila do të zëvendësojë instrumentet aktuale IPA me mekanizma më fleksibilë, duke garantuar vazhdimin e mbështetjes financiare për vendet kandidate.
Maqedonia e Veriut mbetet e bllokuar në procesin e integrimit evropian për shkak të mosmiratimit të ndryshimeve kushtetuese të kërkuara në kuadër të marrëveshjes me Bullgarinë. Këto ndryshime, që përfshijnë përfshirjen e komunitetit bullgar dhe komuniteteve të tjera në Kushtetutë, kërkojnë shumicë prej dy të tretash në Kuvend.
Edhe pse vendi mbajti Konferencën e parë Ndërqeveritare me Bashkimin Evropian më 19 korrik 2022, vazhdimi i negociatave mbetet i kushtëzuar nga miratimi i këtyre ndryshimeve kushtetuese. Qeveria aktuale ka deklaruar se nuk do t’i mbështesë ato në formën aktuale.
